Поэта сурт. Янднаькъан Жамалдий 100 шу дизарга

Янднаькъан Жамалдий 100 шу дизарга
Ховш ма хиллара, йоазонхой – поэташ, прозаикаш, драматургаш – духхьал шоай произведенешка баьха Iац. Цул совгIа уж бах сурташка а. Царех цаIаш да цар йоазоний чулоацам боашхаш, вожаш – цар шоай куц-сибат довзийташ. Иштта цхьа сурт да са дувца безам бар а.

Цхьа иттех шу хьалха айса болх беча школе литературно-художественни музей хьае лаьрхIар аз. Дуккхача йоазонхошта а суртанчашта а тIавахар со гIо-новкъостал дар дехаш. Царех хIаране цхьацца совгIат дир хургйолча музейна. Царех цаI вар гIорваьнна гIалгIай суртанча вола Эсмарзнаькъан Заьлмаха. Аз шийгара цхьа сурт дийхача, хьожаргва со, аьлар цо. Дикка ха яьнначул тIехьагIа, ше денна дош кхоачашдир цо. Со дIа а вийха, халкъа поэта Янднаькъан Жамалдий сурт делар цо сона. Из цо ше дилла дар. Ший боарамга диллача дукха доккха деце а, музейна доккха совгIат хилар цох. Дийна волаш санна хьахьежар цу тIара массанена хьамсара вола поэт.

Iаьржа къоалами каьхати мара хIама ийшадац Заьлмахийна из сурт кхоллаш, бакъда цул дикагIа дилла Жамалдий сурт дайнадац сона. Иштта хул говзанча кулго кхелла болх. Дешархошта дезалу из сурт вахара гаргарча басарашца дилларах, поэта бакъдола куц гойтарах. Цунна хьалха соцабале, дуккха латташ, ха йоаккх цар, цун юхь тIара хIара хобор деша гIерташ санна. Музее экскурси еш, аз айса а дукха дувц поэта вахарах, леларах, кхоллама наькъах лаьца. Уж шеддола хIама довза гIо ду сурта тIарча поэта сибато. Цун ший стихотворенеш санна гIайгIанца, вахара халонца ийна да кIайи Iаьржеи бесаш.

Цхьайолча хана из сурт аз классе чудихье а нийслу, урока тIа Янднаькъан Жамалдах дувца къамаьл дизагIа хулийт цо, дувцар кIоаргагIа дегага кхоачийт. Поэта бIаь шу дузача деношка из сурт вай мехкарча бахархошта а дайзача бакъахьа хет сона. Со теш из царна а дезалургхиларах.

С. Арчаков,
"Сердало"