?ворхi шу дизара хетадаь

Февраль бетта 6-ча дийнахьа, шоатта денна шахьар Магасерча ц1ай даздара ц1аг1а "Маьл" яхача фондо в1ашт1ехьадаьккха той хилар. Из цар хетадаьдар шоаш болх д1аболабаь 7 шу дизара. Фусамдаьша кхайка бийха укхаза баьхка бар мискача наьха хьалаца, вахарца бала бола нах. Уж бар мехка юкъара болх лелабеча организацей викалаш, мискача наьха хьалага хьожаш болх беш йолча фондай викалаш, 1аьдала организацей викалаш, за1апхой, хоамбоаржабераш, гулбеннарий дог г1оздаккха баьхка иллиалархой, иштта кхыбараш а.

В1ашаг1кхетар доладелар укх фондо 1унал деш болча дезалий кагирхоша илли аларца. Хеталу, духхьал мискача наха г1о даьча а ца 1еш, фондо иллиалархой а кийчбу аьнна. Волавалар, йистхилар, илли алар – деррига а боккъонца эттаваьннача иллиалархочун санна да цар. Къаьстта наьха дегашка южаш, наха шоай нана дагайохийташ яр ворх1-барх1 шу даьнна хургйолча, ДЦП оала лазар долча Т1оаршхой Хаде лаккха "Нана" яха илли. Цудухь, вай мехкарча илли алархой муг1араш цар хьалдузаргхиларах тешалу. Иштта айтта баьннача иллиалархоша а лекхар иллеш. Уж бар Чахкнаькъан Рахьман, Горханнаькъан Мадина (Суммая).

Д1ахо, эггара хьалха фонд хьаеллача хана шийна малаг1а духьаленаш нийсъелар а, из болх эшаш больга нах д1акхетабе атта хиннадоацильга а дийцар "Маьл" фонда кульгалхочо Дзейтнаькъан Лейлас. "Бакъдар аьлча, эггара хьалха долалуча хана тахан санна иштта ер г1улакх гаьна дарг ма дий аьнна хетацар. Х1ана аьлча, юххьанца д1адоладеш дола х1ама ч1оаг1а боча хул. Хьайийла фонд я, мискача наха г1о де ийла я, аьлча, хьа хьай гаргарбараш а ца кхеташ моттиг нийсалора. Бакъда, мел хала дале а, ка ца луш, духьал латташ, Даьлагара г1о дехаш хьабаь болх хоза д1аболабелар. Карарча хана дукха ба фонда г1о-новкъостал деш, эшшача оарцаг1а бовла кийча болаш нах. Волонтераш ба, б1арчча фонда 1унал ду цхьоаг1о я. Цхьаькха цхьа х1ама а да лерх1аме, моллаг1ча саго тхона дешдола новкъостал, из ше беррига мехка дельга кхеташ хила веза саг. Т1ехьарча хана дукха фондаш хьа а яьржа, аттача баьннаб болх, амма юххьанца тхо долалуча хана хало дар. Тахан вай мехка хьая благотворительни фондай ассоциация я, за1апхой организацей ассоциация я. Даьла къахетамца, г1улакх аттача даьннад. Вай массадаргаш, кхеташ а долаш, цхьана хуле, мел хала хиларах г1улакх д1ачакхдаккха аьттув баргба вай. Массанена а баркал хилда шоана, шун во ма гулда сона", – аьнна, ловца баккхарца чакхъяьлар Лейла.

Д1ахо кхы а дукхаш йистхилар, х1ара йист мел хиннар, шийна хилча бакъахьа хетар оалаш а, т1ехьарча хана вай мехка хулаш латта хувцамаш малаг1ча оаг1орахьа да оалаш а вар. Массанена а ловш хиннар дар бартболаш, машаре вай дахар, мискача наьха хьалага хьожаш, моллаг1а а эттача халача хьала юхег1олла т1ех цадовлаш, цу оаг1орахьа де йиш йола г1улакх воайла тешаме долаш вай хилар.

Иштта цхьацца оаг1орахьа шоашта г1о-новкъостал деш, оаг1о хьаллаьцача наха баркал кхайкадеш, 36 грамота йийкъар фонда викалаша. Царца цхьана Попов Василия Владимира "Маьл" фонда хьаденна "Мысли вслух" яха байтий гулламаш а дийкъар. Х1аране шийна кхайкадаьча баркала духьала хоза дош а оалаш, д1ахойодача хана кхы а дукхаг1а, дикаг1а фонда а могаш боацача наьха а г1улакхага хьожаргда тхо, аьлар.

Тахан иштта укхаза баьхка бар Г1алг1айче г1олла йолча Росси ДОСААФ отделене викалаш. Цар а шоай оаг1орахьа фонда баркал оалаш, за1апхошта машен лелае бокъо луш дола каьхат хьаэца йишйолаш дола сертификаташ дийкъар. "Д1адахача 2015-ча шера март бетта тхогара, къаьстта тха тхьамада волча Зурабнаькъан Къурайшагара, "Маьл" яхача фонда кульгалхочо Дзейтнаькъан Лейласи, вай мехкарча дистанционно оалача дешара центра кульгалхочо Албохчнаькъан Маликаси дийхадар за1ап бола кагирхой машен лелае 1омабу балара оаша, аьнна. Оаха тхоай оаг1орахьа из къоабалдаь т1а а ийца, болх д1абихьар. Белгалде деза, вай мехка ер мо дола г1улакх хьалхара деш дольга. Тахан оаха укхаза сертификаташ д1а мел деннача кагирхоша, укх бетта 9-ча денна шинарча дийнахьа ГАИ д1ат1а а баха, шоай машен лелаерах йолча бокъон каьхаташ хьаэцаргда. Таханарча дийнахьа 16 коляска чу ваг1аши, виъ вешта могаш воацаши за1апал дола 20 саг ва оаха машен лелае 1омаваьраш. Д1ахойодача хана, Даьла къахетамца вай мехкарча массайолча ДОСААФ школашка за1апхой деша аьттув хургболаш в1ашт1ехьа баьккха болх ба тха. Тхоашта могача тайпара из болх д1ачакхбоаккхаргба оаха. Дала дикача х1аманна т1ехьа аьттув боаккхалба вай массане а", – йоах Г1алг1айче г1олла йолча Росси ДОСААФ отделене тхьамада когаметта йолча 1амарханаькъан Заремас.

В1ашаг1кхетар чакхдоалаш наха ч1оаг1а сакъердам боалаш болх хилар. Укхаза вай мехкарча за1апхой организацей ассоциация кульгалхочо хьадена цар дахка сурташ дар, уж сурташ аукцион оалача боараме мах баь д1аовттадаьчул т1ехьаг1а, цу маьха т1ара баьнна мах кхы а хьаллакхбенна, уж кхо сурт наха д1аийцар. Ала деза, фонд "Маьл" 1унала цхьоаг1он доакъашхочо Оздой Аюпа ше ийца сурт "Маьл" фонда совг1ата д1аделар, аьнна.

Т1еххьара массане цхьана д1аайтта хоза сурт а даьккха, д1а-хьа къаьстар Даьла духьа болча наькъа т1ехьа в1ашаг1а мел кхийттараш. Тешалу, укх тайпара балхаш вай мехка хьа мел деча хана вай халкъа вахара хьал тоалургхиларах.

Матенаькъан Илез

Газета "Сердало" № 18