?Библиотеках хьадоал беркат

Боккха кхаъ хилар Зязик-Юрт бахархошта 2004-ча шера юрта библиотека хьаелларца. Ер санна йола библиотека юрта хилар чIоагIа паргIато я наха.

Дукха адам чулатт укх библиотеке, цхьоалагIча классе дагIача берашкара дIадоладенна пенсионерашка кхаччалца. Укх чу цкъа венар юхава дог оттаргдолаш, цIенеи, сапаргIатеи хул. ЦIи мел яьккха книжка долаш хул, дукхагIа мел йолча хана. МоллагIча вIашагIкхетара материал эшаш хьо укхаза веча, вIалла ца моттача тайпара хоза гIулакх хиле дIавода укхазара. Хийла кийча материал, разработка хьаяла вIаштIехьадоал укхаза къахьегарий, ер библиотек хьайийлача дийнахьа денз укхаза болх беш, къахьегаш йолча библиотека кулгалхочун Илиева Азай.

Iа книжка дийхача, пхи минот хьалха дIаоттадича санна, сиха лох цар.

Эггар хьалха, со балха эттача хана, кхаь-йиъ библиотеке, материал езаш а, цу библиотекай болхлошкара гIулакх эшаш а яхар со. Цхьаннахьа со яхача, цу чура болхлочо ше репетици е езаш я аьлар сога, бераш хьадахкарга хьежаш я ше, аьнна.

ТIехьагIа хьо юхайоагIе хьа гIулакхага хьожаргьяь ше, аьлар цо. Со магIаялийта дукха безам болаш яцар из, хIетта улгаш дила яьннаяр из.

ТIаккха, цигара яьнна со яхар кхыча библиотеке. Цу чура халла, цхьан ах сахьата книжка лахар сона. Цох кхоачам ца хулаш со яхар цхьаькханахьа. Бакъда, укх чура болхло лохаш тоъал ха яькхар аз. ТIеххьара со яхар Зязик-Юртарча библиотеке.

Дукха хана денз сога хьежаш ше ягIача мо Iалаьмате хоза, чам болаш, безаме тIаийцар со Азас. Тамаш я-кх, укх чу наггахьа мара саг воагIе, аьнна меттар сона.

ХIаьта, со укх чура дIаараялале массайта ишколера дешархой, студенташ хилар укх чу. Иштта, безаме йист хилар Аза царга а.

Сайна книжка корадарал совгIа, Iалаьмате чIоагIа пайда ийцар аз Азайгар, цунца хиннача къамаьлах. Ший болх дика кхета а беш, цох яшаш хиларал совгIа, чIоагIа вайнаьха эхь, эздел, сатем, сабар а долаш саг я Аза!

МоллагIа Iа тIадихьа гIулакх цхьан тайпара аьттув боацаш дитац Азас.

Иштта хила веза аьнна хет сона библиотека болхло.

Даьла раьза хилва хьона Аза! Беркате хилба шун болх!

Дзейтова Зара

"Сердало" № 196