Фи дарман кканде "Евромайдандис"

2014 ис весе Украинайин историди "цветной революци" хье ис суман. Чвас кIвалди амичин, мишттин курар ацIун хIуькуматтариъ хьуная ахиран исари: 2000 ис - Югославия, 2003- Грузи, 2004-Украина, 2005- Ливан ра Киргизи, 2011- Тунис, Египет, Ливи, 2011-2013 Сири. Гьеме джалла революцибур хьеф э Америкайи уч гIачучIай сасра хIуькуматтаригI. СШАйи атIун агъайра э, джалла дюнья учикди кичадивас кканди ая пуна. Демократибур, экономикайис кумак аркьаяфе, инсанарис иджвел аркьая чин агъаттар - гькIан Iемаларе тебирин. Чиппис идже хьучина, сасрабирис фи хьичира бала адава СШАйис. Чиппин вахттари, немцарин политикайивас,азманди кIил фадикIуна ая агьал Америкайин политикайи. АцIун ая хIуькуматтара, америкайихъас хъагъишаяттар. ДехIела э америкайи учис кканеттар аркьаф. ГIахъас акьуна хIуькуматтара, кIин ацIун инсанара, хъучучIа Америка хуппай фаттивай ге хIуькуматтарин девлет, нафт хьурай, газ хьурай, къизил хьурай. Хуппай люкIе чиппис мушат аркьаядегьен инсанар. ЯгIайин ягъа, авала сумана, чиппин солдатар ачикай андава америкайи сасра хIуькуматтариди дегIви акьас. Агьал чиппин инсанар дакьес, заварилас бомбит аркьа, Iаф иджеф дагъай. ДегIви акьас хъучика гьеге хIуькуматтиъ ая инсанар сад сайихъай, чиппи гебирис пулра фартай эркьва вархалас хъуланди. Гьер джуре ттурара алиянде гишттин революцибирил: "революция роз", "революция кедров", "тюльпанова революция", "жасминовая революция", "арабская весна", "аранжевая революция", "евромайдан". Фиштти э пичина ме кар ккиянф, магьа миштти: джиркIенде са хIуькуматтиъ инсанар рази адаваттар пачагьдил, хъучика гьеге инсанар паччагь алайкас. Ме инсанари е са закундил юркI алияндава, е гьинагьасра неч аркьай дава, атай, люкIей чиппис кканеф аркьай адарка. Хуппай Америка, экьун вархал, гьикай мебирис пулра, шатти элхъенде эркьва. Мишттин революцибур вере хIуькуматтариъ ацIун инсанара люкIе, барбатI хьуна хIуькуматра гIархъа, закун агъа шейъ кьацIра амелгвандава . Гьерттис уч дузди аргва, уч хIайи аргва, хIаф-бицIиф агъайдава. Инсанарис мишттин хIуькуматтиъ ешамиш хьас ве гучI. Фи акьуна кканде пичина хьин хье хIуькуматтиъ гишттин курар дахьас. Сад пеф - хьин варха хьуна кканде гишттин чIалар агъа инсанаригьас, хъучушуна ккандава фачерхьеттихъ. Гьертти фикир акьуна кканде учин келлайилди - фиштти акьучина хьасе инсанарис иджвел, фиштти акьучина хьасе Iайвел. Ме кураригI гIачадархьас хье динди идже чIалар агъа. Хье Пайгъамбардин асхIаба Ибн Масуда миштти пуне: "Фи хьичира чун сабур акье. чIирхIе, дузвел фадава паччагьдин хIавел 50 исди иджи э, эгера гIахъубар на кIебар вей далара".